Poblashon di Kòrsou a baha ku 1.7% na aña 2021 kompará ku aña 2020 (sifra preliminar)

Willemstad - Ofisina Sentral di Statistik (CBS) ta presentá sifranan preliminar di e poblashon total di Kòrsou pa promé di yanüari 2022. E poblashon di Kòrsou a baha ku 1.7 % na aña 2021 kompará ku e aña 2020. E poblashon total di Kòrsou ta konsistí na promé di  yanüari 2022 for  di 151.066 persona. Na aña 2021 e total di persona tabata 153.671.

E poblashon a baha gradualmente di promé yanüari di 2018 te ku promé di yanüari 2022 ku 5.6 porshento. Por mira esaki for di e siguiente grafiko:

Poblashon na sekso

E poblashon na 2021 tabata konsistí for di 82410 hende muhe (54.6% di e poblashon) i 68656 hende hòmber (45.4%). Si wak e proposhon na sekso esaki ta pa ana 2021 83.3 pa 100 hende muhe.

Poblashon na edat.

E grupo di edat  ku tin mas tantu persona na Kòrsou ta entre 45-59. E grupo di edat aki ta forma 22.3% di e poblashon total di Kòrsou.  E total porsentahe di e otro grupo di edatnan ta lo siguiente: 0-14 (16.6%), 15-29 (15.9%), 30-44 (17.6%), 60-74 (19.4%) i e grupo di edat 75+ ta forma 7.8% di e poblashon total.

Poblashon di 60+ i 65+

Si nos wak e grupo di edat 60+ por bisa ku esaki a subi entre 2022 ku 2021 ku 953 persona, esaki ta un subida di 2.3%Pa ku e grupo di 65+  por mira un subida di 711 persona entre 2022 (29219 persona) i 2021 (29930 persona), esaki ta un subida di 2.4%

Tur e informashon aki i mas detaye ta aksesibel akinan Population Tables | Central Bureau of Statistics Curaçao (cbs.cw)