Nivel di empleo na Kòrsou a baha ku kasi 4,500 persona na aña 2020 kompará ku 2019.
Resultado di Enkuesta Forsa Laboral 2020
Willemstad, Ofisina Sentral di Statistik (CBS) Kòrsou a tene e Enkuesta di Forsa Laboral (AKO) na Kòrsou di 10 di òktober te ku 1 di novèmber 2020. Enkuesta di Forsa Laboral ta un sondeo bou di e kasnan di famia ku CBS ta tene tur aña den luna di sèptèmber/òktober for di 1987, pa midi e desaroyonan mas resien riba merkado laboral, manera e sifra di desempleo, e nivel di partisipashon, e kantidat di habitante ku tin trabou i e kantidat ku ta buskando trabou.
Den 2020 e merkado laboral a ser impaktá dor di COVID-19. Esaki sigur tabata tin desaroyo negativo riba e sifra di empleo. Ora wak sifranan di 2014 te ku 2020, por mira ku na 2020 e kantidat di persona ku ta empleá a baha severamente kompará ku e añanan anterior. Esaki ta entre otro pa motibu di e bahada den demanda riba merkado laboral dor di COVID-19. Mester bisa mesora ku e situashon por tabata pió paso segun datonan ku CBS a kolekta, 34% di personanan empleá a indiká ku nan no a pèrdè trabou pero si, pa un tempu largu/indefiní, a pèrdè ora di trabou, salario òf (parti di) benefisionan sekundario pa motibu di COVID-19 (52.6% a indiká ku nan no a pèrdè nada).
Algun resultado importante for di Enkuesta forsa laboral 2020 ta:
- E total di personanan empleá a baha di 61,547 persona na 2019 te 57,050 persona na aña 2020. E bahada di kasi 4,500 persona ta e resultado di oferta i demanda riba e merkado laboral. E sifra aki ta duna e bista real di e impakto ku e desaroyonan ekonómiko riba nos isla, inkluyendo desaroyonan a konsekuensia di COVID-19, tabata tin entre òktober 2019 i òktober 2020.
- Tin un subida tambe di e total di persona ku aktivamente ta buskando trabou. Esaki a subi di 12,992 persona na aña 2019 pa 13,442 na aña 2020. Segun definishon internashonal ku CBS tin ku usa pa por kompará sifranan di Kòrsou ku otro pais, por kalifiká un persona komo unu ku ta buska trabou solamente si e persona ta buskando aktivamente (solisitando) i lo por kuminsá denter di 2 siman si e haña un trabou. Pa e motibu ei ta mira un subida leve den e kantidat di persona ku ta buskando trabou, kontrali na loke a spera.
- Por lo tantu, e sifra di desempleo a subi na aña 2020 bira 19.1% kompará ku 17.4% di aña 2019.
- Partisipashon laboral na Kòrsou, ku ta e parti di poblashon empleá i esun ku ta buskando trabou aktivamente, a baha di 74.539 te 70.492 na aña 2020. Esei ta un bahada di 4.047 persona. Si nos mira esaki komo parti di e poblashon di 15 aña bai ariba, nos ta mira ku partisipashon a baha di 59.7% na 2019 pa 56.4% na 2020.
Por último
CBS ta gradisí tur e kasnan di famia ku a kontribuí na éksito di e enkuesta akí.