Enkuesta Forsa Laboral 2022 ta ser prolongá te ku 10 di desèmber próksimo

Aktualmente Ofisina sentral di Statistik ta ehekutando Enkuesta Forsa Laboral bou di 3.500 kas di famia. E intenshon di e enkuesta aki ta pa tur miembro di e kas kontestá algun pregunta tokante di nan posishon riba merkado laboral.

Dor di e situashon di tempu (awaseru) CBS no a logra pa entrevistá tur kas di famia manera planea. Pa e motibu aki CBS a prolongá e periodo di enkuesta ku 2 siman. Te ku 10 di desember próksimo enkuestadonan di CBS lo bishitá algun  kasnan di famia ainda den kuadro di Enkuesta Forsa Laboral 2022. 

Manera indiká anteriormente tur enkuestado di CBS tin un badge ku e siguiente informashon  nòmber /potrèt/logo di CBS i  firma di e direktor di CBS.  Tur enkuestado tin e deber di legitimá su mes na momento ku e presentá na e kas di famia. Por yama ofisina di CBS semper pa verifiká ku tin un enkuesta di CBS na e momentunan aki andando  i pa verifiká e nòmber di e enkuestado. E number di telefon di CBS pa hasi esaki ta : 839 2300. Ta bon pa indiká tambe ku CBS ta obligá pa lei pa tene tur dato ku a ser kolektá konfidensial i sekreto.

 CBS ta urgi tur persona pa nan partisipá pasobra ta importante pa Kòrsou tin sifra di labor aktualisá ku por usa p.e. pa traha maneho ku ne. Tur resultado di Enkuesta Forsa Laboral lo ser publika  pa medio di un komunikado pa prensa, pero tambe tur informashon lo ta aksesibel gratuitamente riba e wepsait di CBS, www.cbs.cw  

CBS ta gradesí tur kas di famia pa nan koperashon pa hasi e enkuesta aki bira un éksito.