Enkuesta di Forsa Laboral 2022 organisá dor di Ofisina Sentral di Statistik (CBS) ta kuminsá na Kòrsou.

Djasabra 29 di òktober pròksimo entrevistadónan di CBS lo pasa algun kas di famia (3.500) pa hasi tur miembro di e kas (for di 0 aña) algun pregunta tokante di nan posishon riba merkado laboral den kuadro di Enkuesta di Forsa Laboral ku CBS ta kuminsá ku n’e.

Meta di Enkuesta Forsa Laboral ta pa haña un bista riba e situashon laboral di e poblashon di Korsou anualmente.  E dato di mas importante den e enkuesta aki ta e porsentahe di desempleo. E porsentahe aki ta indiká kua parti di e Forsa Laboral no ta trahando aktualmente. Importante tambe ta pa sa kuantu persona ta traha i kuantu persona no ta ekonomikamente no aktivo, o sea no ta trahando pero tampoko ta buskando trabou E aña a añadí 3 pregunta tokante e siguiente tópikonan: Medionan Sosial, koheshon Sosial i Pobresa.
 

Tur enkuestado di CBS tin un badge ku e siguiente informashon  nòmber /potrèt/logo di CBS i  firma di e direktor di CBS.  Tur enkuestado tin e deber di legitimá su mes na momento ku e presentá na e kas di famia. Por yama ofisina di CBS semper pa verifiká ku tin un enkuesta di CBS na e momentunan aki andando  i pa verifiká e nòmber di e enkuestado. E number di telefon di CBS pa hasi esaki ta : 839 2300. Ta bon pa indiká tambe ku CBS ta obligá pa lei pa tene tur dato ku a ser kolektá konfidensial i sekreto.

Kontrali na tur otro aña e biaha aki  e kas di famia ku a wòrdu selektá pa medio di un muestra pa partisipá na e enkuesta aki no a risibí un karta di CBS adelantá pa splika e meta di e enkuesta, E biaha aki e  enkuestadó ku lo bishitá e kas mes ta entregá e karta na e famia.

CBS ta urgi tur persona pa nan partisipá pasobra ta importante pa Kòrsou tin sifra di labor aktualisá. Medio desèmber di e aña aki lo publiká e resultadonan di e Enkuesta Forsa Laboral 2022. Ta hasi esaki pa medio di un komunikado pa prensa, pero tambe tur informashon lo ta aksesibel gratuitamente riba e wepsait di CBS, www.cbs.cw

CBS ta gradesí tur kas di famia pa nan koperashon pa hasi e enkuesta aki bira un éksito.

Pa mas detaye di e resultadonan di Enkuesta forsa Laboral 2020 por klek aki