Enkuesta di Forsa Laboral 2022 organisá dor di Ofisina Sentral di Statistik (CBS) ta kontinuá na luna di febrüari 2023

CBS a start aña pasa na luna di òktober ku Enkuesta di Forsa Laboral pa aña 2022. Dor di diferente faktornan no tabata posibel pa bishitá tur e kasnan di famia ku mester a bishitá (en total 3500) aña pasa. Pa e motibu aki CBS ta bai sigui na luna di febrüari ku e proyekto aki i ta bai bishitá e kasnan (+/- 1000 kas) ku no a logra bishitá aña pasa. Di e forma aki por terminá ku e fase di kolektá e datonan di labor.

Meta di Enkuesta Forsa Laboral ta pa haña un bista riba e situashon laboral di e poblashon di Kòrsou anualmente.  E dato di mas importante den e enkuesta aki ta e porsentahe di desempleo. E aña a añadí 3 pregunta tokante e siguiente tópikonan: Medionan Sosial, koheshon Sosial i Pobresa.

Tur enkuestado di CBS tin un badge ku e siguiente informashon  nòmber /potrèt/logo di CBS i  firma di e direktor di CBS.  Tur enkuestad tin e deber di legitimá su mes na momento ku e presentá na e kas di famia. Por yama ofisina di CBS semper pa verifiká ku tin un enkuesta di CBS na e momentunan aki andando  i pa verifiká e nòmber di e enkuestadó. E number di telefon di CBS pa hasi esaki ta : 839 2300. Ta bon pa indiká tambe ku CBS ta obligá pa lei pa tene tur dato ku a ser kolektá konfidensial i sekreto.

CBS ta urgi tur kas di famia ku risibí un bishita di enkuestadó den luna di februari awor pa nan partisipá pasobra ta importante pa Kòrsou tin sifra di labor aktualisá. Pa luna di mart di e aña aki lo publiká e resultadonan di e Enkuesta Forsa Laboral 2022. Ta hasi esaki pa medio di un komunikado pa prensa, pero tambe tur informashon lo ta aksesibel gratuitamente riba e wepsait di CBS, www.cbs.cw i tambe e kanalnan di medionan sosial di CBS.

CBS ta gradesí tur kas di famia pa nan koperashon pa hasi e enkuesta aki bira un éksito.