CBS ta start ku Enkuesta Forsa Laboral i Inklushon Finansiero pa 2024

Willemstad ;  Ofisina Sentral di Statistik (CBS) ta informá ku entre 19 di òktober i 30 di novèmber lo start  ku Enkuesta Forsa Laboral (AKO) i Inklushon Finansiero (FI) pa aña 2024. Enkuesta Forsa Laboral ta midí e desaroyonan mas resien riba merkado laboral na Kòrsou, esaki ta e porsentahe di desempleo, e sifra di desempleo hubenil, e  poblashon total ku ta ekonómikamente aktivo, i e kantidat di hende ku ta buska trabou. E resultado di e enkuesta lo duna un imágen kla di e situashon aktual di e merkado laboral na Kòrsou

Kolaborashon ku Banko Sentral di Kòrsou i Sint Maarten (CBCS)

CBS ta kolaborá e aña aki ku Banko Sentral di Kòrsou i Sint Maarten (CBCS) pa inkluí preguntanan adishonal relashoná ku inklushon finansiero. E preguntanan ta enfoká riba midí si hende tin akseso na produkto finansiero manera kuenta di banko, kuenta di spar, i métodonan di pago. E meta ta pa krea un bista mas kla di e nivel di inklushon finansiero na Kòrsou, i pa traha riba konsientisashon tokante e importansia di aksesibilidat di produkto i servisionan finansiero.

Kasnan di famia ku a ser selektá i  partisipashon

Na total, 2.650 kasnan di famia a ser selektá pa partisipá na e enkuesta. Tur kas ta risibí un karta di notifikashon di parti di CBS ku petishon pa nan kolaborá ora un enkuestadó yega na nan kas durante e periodo ariba menshoná. E kontribushon di kada persona den e kas di famia ta esensial pa por haña data konfiabel i aktualisá ku ta reflehá e realidat di e merkado laboral i situashon di inklushon finansiero na Kòrsou.

Konfidensial

CBS ta garantisá ku tur informashon risibí lo ta ser uzá eksklusivamente pa meta estadístiko. Konforme ku lei di statistik (PB 2011, nr. 19), tur dato lo wòrdu manehá di forma konfidensial i sekreto. Esnan ku ke mas informashon tokante e lei por bishitá e website di CBS na www.cbs.cw.

Publikashon di e resultadonan

E resultadonan di e enkuesta AKO & FI 2024 lo ser publiká pa medio di  un komunikado di prensa i lo ta aksesibel pa tur hende di forma gratuito riba e website di CBS, www.cbs.cw. Resultadonan di Inklushon Finansiero lo ser analisá dor di CBCS i lo ser publiká riba nan website tambe ku ta www.centralbank.cw

Agradesido

CBS di antemano ta ekspresá su gratitut na tur kas di famia ku a ser selektá i ta urgi pa nan partisipá ku e enkuestadónan pa asina e enkuesta por bira un éksito i e resultadonan por sirbi komo base konfiabel pa desaroyo i planifikashon pa komunidat. Mas informashon di e enkuesta aki por subi riba e site www.cbs.cw/AKO-FI2024