CBS ta start ku Enkuesta di Koyuntura pa aña 2024

Willemstad ; Ofisina Sentral di Statistik (CBS) ta kuminsá na luna di novèmber ku Enkuesta di Koyuntura bou di empresanan selektá. Meta di e Enkuesta di Koyuntura akí ta pa kolektá informashon aktualisá riba desaroyo di negoshi i desaroyo ekonómiko pa industria i sektor di negoshi den su totalidat. Ademas, ta pidi opinión tokante konfiansa di empresarionan riba desaroyo ekonómiko i klima di invershon.

Sifranan di Enkuesta di Koyuntura (konhuntu ku preguntanan di opinión) no ta sifranan definitívo, sino estimashon.

Enkuesta di Koyuntura  ta un sondeo bou di kompanianan ku dies òf mas trahadó, miéntras serka e kompanianan ku entre 3 te ku 9 trahadó lo hasi un muestra (steekproef). Total lo enkuestá mas o ménos 800 kompania. 

Koperashon di e kompanianan lo pone e enkuesta aki bira eksitoso. CBS ke gradesí di antemano tur kompania ku ser aserká pa nan tempu i esfuerso. Bishitá website di CBS pa resultadonan di Enkuesta di Koyuntura di añanan anterior.

Un resultado importante for di Enkuesta di Koyuntura ta e índise di koyuntura. 

E índise di koyuntura ku ta agregá a base di konfiansa den futuro, persepshon i klima di invershon i kambionan di volúmen di benta, a bira na desèmber 2023 114 ku ta un subidá kompará ku 2022 (101)