CBS ta presentá resultado di poll “Nos Karnaval. Kon bo ta mir’e?”

Willemstad : Entre 3 pa 7 di febrüari Ofisina Sentral di Statistik (CBS) a organisá un “poll” titulá “Nos karnaval. Kon bo ta mir’e?

E meta prinsipal di e poll aki tabata pa sa opinion di respondentenan tokante aktividatnan di karnaval i tambe di e festival di tumba. E inisiativa aki ta wòrdu ehekutá den kolaborashon ku AMAK.

Partisipashon na e poll aki a tuma lugá durante e kuater anochinan di e festival, usando tantu enkuestadónan na Festival Center komo e plataforma online pa logra un alkanse maksimal di rèspòns. Esnan ku a asistí na e Tumba festival a wòrdu enkuestá direktamente den Fesitval Center mes. Mientras ku e poll tabata online tambe riba e app di Festival di Tumba, e Facebook Pagina di Tumba Festival i di CBS.

Total a kolektá 823 enkuesta, esaki ta un total sólido ku por ser usa pa analisá e datonan. E distribushon di e partisipashon ta na manera siguiente: 732 enkuesta a ser kompletá na Festival Center, 24 enkuesta a wòrdu yená via e aplikashon Festival di Tumba, i 67 enkuesta a keda kontestá via e link online riba e página di Facebook di CBS.

Ku un total di 7743 bishitante na Tumba Festival, e poll a logra kue aproksimadamente 10.6% di e perspektiva di esnan ku a asistí, ofresiendo un muestra representativo di e eksperensia general di e festival. E siguiente sekshonnan ta detayá e resultado di e enkuesta, dunando un bista mas amplio den e opinionnan i eksperensianan di esnan ku a partisipá.

Aki ta sigui algun resultado di e poll aki:

 Informashon general di respondente
A partisipá 823 persona na e poll aki. Di kual 45.5% ta hende hòmber i 54.5% hende muhé.

Ora ta trata e tópiko den ki forma hende ta partisipá den e parada, e resultado di e enkuesta ta mustra ku 49.27% di e respondentenan ta bai para kantu di kaminda pa wak e parada. 25.3% ta partisipá di forma aktivo i ta marcha den e desfile mes. 19.22% a indiká ku nan ta wak e marcha di karnaval na televishon. 3.89% ta traha komo staf den un grupo di karnaval òf agrupashon musikal. Finalmente, 1.46% di e partisipantenan a indiká ku nan no ta partisipá den ningun forma na karnaval. 

Durante e periodo di Karnaval tin diferente evento òf parada karnavalesko ta wòrdu organisá di kua kada un tin su gastu mara na dje. Segun e resultadonan di e “poll”, e Marcha Grandi di Karnaval ta e evento ku e gastu promedio di mas haltu, ku ANG 670,-, indikando su peso ekonómiko durante e temporada di Karnaval. Festival di Tumba ta e siguiente evento kaminda hende ta saka mas tantu sèn na ANG 544,- , siguí pa e Marcha di Despedida i eventonan di Jump-in/Jump-up.

CBS a prepará un rapòrt kompletu tokante e Poll di Karnaval aki ku ta kontené tur informashon adishonal manera gastu segun evento di karnaval, motibu di partisipashon, método di finansiamentu, asistensia na evento i mas. Pa lesa e rapòrt kompleto, por bishitá Results Carnaval Poll 2025 | Central Bureau of Statistics Curaçao