CBS ta presentá resultado di Enkuesta Forsa Laboral 2022

Willemstad, Ofisina Sentral di Statistik (CBS) Kòrsou a tene  Enkuesta di Forsa Laboral (AKO) na Kòrsou entre òktober 2022 pa febrüari 2023. Enkuesta di Forsa Laboral ta un sondeo bou di e kasnan di famia ku CBS ta tene kasi tur aña na  luna di sèptèmber/òktober for di 1987. Meta di e enkuesta aki ta pa midi e desaroyonan mas resien riba merkado laboral, manera e sifra di desempleo, e nivel di partisipashon, e kantidat di habitante ku tin trabou i e kantidat ku ta buskando trabou.

Aki ta sigui algun resultado importante di e Merkado Laboral pa Kòrsou pa aña 2022:

• Entre 2020 i 2022 e sifra di desempleo a baha di 19.1% pa 13.1% respektivamente. Pa aña 2022 e bahada aki ta debi na un kresementu di e total di personanan ku por laborá. Na e sifra absoluto por mira ku tin un bahada di 3.407 persona ku ta buskando trabou (desempleá).

• E total di personanan empleá a subi di 57.050 persona na aña 2020 te 66.722 persona na aña 2022. Kual ta un subida di 9.672 persona.

• Tin un bahada tambe di e total di persona ku aktivamente ta buskando trabou (desempleo). Esaki a baha di 13.442 persona na aña 2020 pa 10.035 na aña 2022. Segun definishon internashonal ku CBS ta usa pa por kompará sifranan di Kòrsou ku otro pais, por kalifiká un persona komo unu ku ta buska trabou solamente si e persona ta buskando aktivamente (solisitándo) i lo por kuminsá denter di 2 siman si e haña un trabou.

• E poblashon laboral aktivo (beroepsbevolking)  na Kòrsou, esaki ta ser definí komo e total di e personan ku ta empleá huntu ku esunan ku ta buskando trabou. E grupo aki a subi di 70.492 na 2020  te 76.757 persona na aña 2022. Esaki ta un oumento di 6.265 persona.  E subida  aki ta debí na un kresementu di e total di personanan ku ta empleá (57.050 na 2020 pa 66.722 na 2022), un bahada di e total di desempleadonan. E bahada di desempleadonan ta probablemente dor ku un kantidat di e poblashon laboral no aktivo a bira aktivo (a kuminsa traha)  entre 2020 pa  2022.

• Sifra di desempleo bou di hóben (15-24 aña) a baha di 42.2% na aña 2020 pa 29.8% na aña 2022.. E total di hóben (15-24 aña) entre 2020 ku 2022 a baha ku 1.461 hóben. Ta importante pa indiká ku e sifra di labor ta ser midi for di 15 aña i ku hopi di e hóben entre 15-24 aña ta baiendo skol òf ta sigui un kurso pero ta buska un ‘bijbaantje’. Bo ta ser konta komo desempleado si bo ta buska trabou aktivamente i si bo por kuminsá traha dentro di 2 siman.

Por último
 

CBS lo trese den komienso di e luna di mei un publikashon ku analisisnan aklaratorio tokante e desaroyo di e bahada di e sifra di desempleo.
 

Mas informashon (tabèl) di e merkado laboral 2022, na sekso i edat, ta aksesibel riba e wèpsait di CBS https://www.cbs.cw/labour

CBS kier a gradisí tur e kasnan di famia ku a kontribuí na éksito di e enkuesta akí.