CBS ta pidi atenshon pa uzo di statistik ofisial

Willemstad : Ofisina Sentral di Statistik (CBS) ta e entidat ku konforme lei ta kolektá, analisá, i publiká estadístika ofisial relashoná ku situashon sosial i ekonómiko di Kòrsou. CBS a tuma nota ku den algun okashon, riba medionan sosial, ta hasiendo uso di datonan ku no ta kuadra ku e sifranan ofisial ku CBS a produsí i publiká riba su wèpsait. Tin biaha ta hasi komo sifuera e sifranan aki ta di CBS.

CBS ta enfatisá ku ta di suma importansia pa interpretá i verifiká e statistiknan ku CBS publiká semper den e konteksto korekto. Den e lus di e situashon aki, CBS ta hasi un yamada pa, ora ta uza informashon estadístiko ofisial pa konsultá e wèpsait di CBS, www.cbs.cw, pa konfirmá unda tin e informashon ofisial. E wèpsait di CBS ta un fuente konfiabel ku ta garantisá e integridat di e datonan segun regla i lei di estadistika ku tur CBS mester mantené nan mes na dje .

Dor di hasi uzo di e wèpsait por sigurá ku ta manehá i distribuí informashon ku ta basá riba sifranan ofisial. Esaki ta esensial pa mantené un komunidat bon informá i pa evitá ku informashon no ofisial por krea un imágen robes di e situashon sosial i ekonómiko di Kòrsou.

Pa kualke pregunta adishonal òf klarifikashon, por tuma kontakto ku CBS pa medio di telefòn na 839-2300, e-mail na info@cbs.cw, òf WhatsApp na 520-2227.