Enkuesta Forsa Laboral & Inklushon Finansiero 2024

Den e periodo di 19 òktober te ku 30 novèmber próksimo CBS ta organisá Enkuesta Forsa Laboral 2024. CBS ta kolaborá e biaha aki ku Banko Sentral di Kòrsou i Sint Maarten (CBCS) ku algun pregunta adishonal tokante inklushon finansiero.

Ken ta parisipá na e enkuesta aki?
En total, 2.650 kasnan di famia a ser selektá pa partisipá na e enkuesta. Tur kas di famia a risibí un karta di notifikashon di parti di CBS ku petishon pa nan kolaborá ora un enkuestadó yega na nan kas durante e periodo ariba menshoná.

Bo data nan ta sigurá
CBS ta garantisá ku tur informashon risibí lo ta ser uzá eksklusivamente pa meta estadístiko. Konforme ku lei di statistik (PB 2011, nr. 19), tur dato lo wòrdu manehá di forma konfidensial i sekreto. Esnan ku ke mas informashon tokante e lei por bishitá e website di CBS na www.cbs.cw.

Kontakto
Pa mas informashon tokante e enkuesta aki, por tuma kontakto ku CBS, Sra. Mary Provence, departamentu di “Veldwerk”, number di telefòn: 522-3181

Nos ke gradisí tur kas di famia ku a partisipá di antemano pa bo nan tempu i kontribushon pa hasi e enkuesta aki un éksito.

Informashon di Enkuesta Forsa Laboral 2024

Enkuesta Forsa Laboral(AKO) tin komo meta haña mas komprondementu tokante e merkado laboral na Kòrsou. Durante e periodo aki, 2650 kas di famia selektá, lo wòrdu aserká dor di un entrevistadó di CBS pa kolektá informashon. AKO ta kolektá informashon tokante e porsentahe di desempleo, e desempleo hubenil, tamaño di e poblashon ekonómikamente aktivo i kantidat di hende ku ta buska trabou. E resultadonan di AKO ta yuda pa forma un idea kla di e desaroyo di e merkado di trabou di Kòrsou.

Enkuesta di Forsa Laboral (Arbeidskrachtenonderzoek AKO) ta un instrumento esensial pa kompilá dato riba desaroyonan di empleo, i e estado di e merkado di laboral. E ta duna informashon tokante vários aspekto di empleo, manera:

• Situashon di Trabou: Si habitantenan ta empleá, ta buskando trabou, òf no ta forma parti di e forsa laboral.

• Tasa di Desempleo: E porsentahe di hende ku ta buska trabou aktivamente pero no por hañ'e.

• Kondishon di Trabou: Informashon tokante oranan di trabou, tipo di empleo (full time, part time etc), i sektornan unda hende ta laborá.

• Demografia: Edat, sekso, nivel di edukashon, i otro faktornan ku ta trata empleo.

Partisipashon den e enkuesta ta esensial pa garantisá dato aktualisá, ku lo yudá pa mehorá oportunidatnan di empleo. E enkuesta ta yudá gobièrnu i sektor privá pa komprondé e merkado di trabou, i tuma desishon informá tokante polítika di empleo, programa di kapasitashon, i planifikashon ekonómiko. Tambe e ta yudá pa kontrolá e estado di ekonomia, evaluá e efekto di krísis, i mehorá lei di trabou.

Pa tur resultado di Enkuesta Forsa Laboral 2022 klek akinan Labour | Central Bureau of Statistics Curaçao (cbs.cw)

Informashon di Enkuesta Inklushon FInansiero 2024